చైనా, పాక్ సరిహద్దుల్లో అత్యాధునిక హెరాన్ డ్రోన్లను మోహరించిన భారత్

చైనా, పాకిస్థాన్ దేశాలతో భారత్ సరిహద్దులు ఎంత సమస్యాత్మకమైనవో ప్రత్యేకంగా చెప్పనక్కర్లేదు. ఏమాత్రం ఏమరుపాటుగా ఉన్నా, ప్రత్యర్థి బలగాలు మన భూభాగంలోకి చొచ్చుకుని వచ్చే అవకాశాలున్నాయి. గతంలో పలుమార్లు ఇలాంటి సందర్భాలు చోటుచేసుకున్నాయి. 

ఈ నేపథ్యంలో, భారత కేంద్ర ప్రభుత్వం సరిహద్దుల భద్రతకు అత్యంత ప్రాధాన్యత ఇస్తోంది. ఇప్పటికే రాఫెల్ వంటి శత్రు భీకర ఫైటర్ జెట్లను సరిహద్దులకు సమీపంలో ఉండే వాయుసేన స్థావరాలకు తరలించిన రక్షణ శాఖ... తాజాగా చైనా, పాక్ సరిహద్దుల్లో అత్యాధునిక హెరాన్ ఎంకే-2 డ్రోన్లను మోహరించింది.

ఈ మానవ రహిత డ్రోన్లతో బహుళ ప్రయోజనాలున్నాయి. భిన్న లక్ష్యాలపై 24 గంటల పాటు నిఘా వేయడమే కాదు, దాడుల సందర్భంగా యుద్ధ విమానాలకు సహకరిస్తాయి. ఇది యుద్ధ విమానాలకు ఎలా సహకరిస్తుందంటే... ఈ డ్రోన్ నుంచి టార్గెట్ పై ఓ లేజర్ కిరణం పడుతుంది. ఆ కిరణం పడిన టార్గెట్ ను యుద్ధ విమానం సులువుగా గుర్తించి తుత్తునియలు చేస్తుంది. 

150 నాట్స్ వేగంతో పయనించే ఈ డ్రోన్లు గరిష్ఠంగా 35 వేల అడుగుల ఎత్తులో ప్రయాణించగలవు. వీటిని ఇజ్రాయెల్ ఏరోస్పేస్ ఇండస్ట్రీస్ తయారుచేస్తోంది. ప్రతికూల వాతావరణ పరిస్థితుల్లోనూ ఇవి నిరాటంకంగా ప్రయాణిస్తాయి. చూడ్డానికి చిన్న సైజు విమానంలా కనిపించే ఈ హెరాన్ డ్రోన్లు ఒక్కసారి గాల్లోకి లేచాక ఏకబిగిన 36 గంటల పాటు ప్రయాణించగలవు.